Aparquiamos ena AS-225 (de Villaviciosa a L´Infiestu), nel cruce a Villa Baxu (pola AS-336) y a Trambarría (nel otru sen). Onde la marquesina, baxa´l camín a esti pinganón, que ta ellí mismu. Baxando 100 mtrs pola carretera, vemos a la manzorga dos cartelos de cascada, siguimos hasta cruciar esti otru riu y caminamos a la so vera dexándolu siempre a la mandrecha. Al pocu, llegamos a una cascadina de metro y mediu al llau les ruines d´una minicentral llétrica o un molín grande, siguimos riu arriba hasta llegar a otra preciosa cascada, ya mas grande, de cuatro niveles y tamién al llau de les ruines d´una minicentral llétrica o molín grandón. Subiemos agora a un camín que mos acerca a una pista, pero antes de llegar a ella, acercámonos otra vegada al riu pa ver una poza y otres dos mini cascades que tán penrriba la grande. Ya ena pista, viramos a la manzorga pa llegar a l´aldeína de Trambarría y dempués al cruce la carretera ú tá l´auto. Toda esta vuelta circular, serán unos tres kilómetros escasos. Tamién podemos llegar a esti puntu dende Colunga por Lliberdón y El Altu La Llama pola AS-258.
