Xente del Sueve

Manolín, de Bucial y Vitorina, de Lliberdón.

Posando pa la máquina de retratar, n´ Espineres,  n´Agostu 2017, cuando yos entregaren el premiu na Fiesta L´Asturcón.

Yo, Manolín Cortina Fernández, nacíu n’El Bucial, una casería ente Pernús y Pivierda, quiero agradecer a la Xunta d’ACAS y también a la Xunta Alministrativa de los Pastos del Sueve, esti honor de Pastor Mayor de 2017. Ya en 2008 –y lu dieréis a mio Pa, porque la mía ye una familia que siempre vivió nes altures d’esti monte.

Naquellos tiempos de miseria, desde mio casa, que ye bien probe, nos iviernos prendíamos cuatro vaques casines que subíamos a estos pastos de marzo a noviembre porque xunta casa, namás teníamos un praucu bien pequeñu, aunque cuando lu segábamos a guadaña abultábanos grande abondo. Al baxar teníamos ya dos o tres xatinos qu’habíen nacíu nel branu.

Antes de los 10 años ya subía yo con mio Pa a veles. D’aquella acolumbré y contemplé estes grandes camperes, cuetos y foyos y daquién me dixo al veme así d’arremelláu qu’esti prau tan descomanáu tenía 5 mil Hectaries. Eso debe ser munchísimu, pensé yo pa escontra mí.

Al pasu los años fuimos creciendo los míos hermanos y yo, y con nós crecía la reciella. Un añu, mio Pa compró una yegua asturcona na feria d’El Infiestu y el ganáu fue medrando y aumentando hasta llegar a xuntar siete vaques y cinco asturcones, tou ello gracies al nuestru trabayu y a esti benditu Sueve.

Nos atapaceres de la Seronda, xuntábomonos los vecinos pa facer les esfoyaces y los vieyos contaben cuentos y cómo fueren los tiempos pasados. Alcuérdome de mio Pa, Julín, cuando nos contó un día que subió a ver el ganáu y llevó un segote y un sacu; fue hasta Los Vasos, que ye un sitiu onde hay un manantial al que pueden llegar con dificultá les persones, pero non les vaques porque hay que pasar ente fileres de piedres mui xuntes de dos o más metros de altor. Ente estes piedres nace un buen pastu y como mio Pa yera pequeñu y flacu diba segotiando y metiendo en sacu puñadinos de pación pa da-y a una vaca mientres la cataba y poder sacar un cuartillu de lleche pa facer unes farrapes pa comer… y nun nos aburríamos, asina yera como vivíamos antes, en la naturaleza siempre, con poques coses pero felices de ayudanos unos a otros.

Gracies a toos por escúchame.

Esti papelucu, en bable, fue fechu por el mio amigu Enrique G.O.

Oda al Sueve

La vida de los pastores, por C. Balbín (1995)

Desde abril hasta noviembre,

subíamos a la montaña

co´les vaques y les oveyes,

y con toda la manada.

Y quedábamos allá,

viviendo e´na cabana,

empotrada ente les peñes,

cuasi xunto a la mayada.

Dormíamos n´a tenada

metíos ente la herba,

tapaos co´nuna manta,

o facíamos un furacu

p´ente el medio de la paya.

Mecíamos la “Casina”,

la “Pongueta” y la “Chavala”,

la “Roxa” y la “Pardina”,

y tamién alguna cabra.

Llenábamos la caramañola,

(pa´facer güena cuayada),

hasta llenar el zurrón,

´onde después se maciaba;

y echándolu al recostín,

ximielgándolo al baxar

hasta llegar a casa,

y echando a los cuatro vientos

una güena cantarada:

“E´na braña de Cezures

robaren un cobertore,

y el que lu robó dicía,

ojalá fora meyore”.

O la otra que dicía:

“Tengo de subir al puertu,

aunque me cubra la nieve…”

“Si la nieve resbala

qué hará el romero…”

Y la más guapequina, dicía:

“La Virgen de Covadonga

ye pequeñina y galana,

aunque baxara del cielo

no hay pintor que la pintara”.

¡Qué llechi que se tomaba

cuando se mecín les vaques,

y los quesos que facíen

de la llechi de les cabres!.

¡Cuántes veces resbalamos

per aquellos cuestibayos,

rodando p´ente les peñes!,

pero nunca nos quexamos.

Y, ellí, n´aquelles cabanes

éramos los más felices,

sin calendarios ni radios,

sin discursos nin noticies.

Hasta que los vientos anunciaben,

desde los picos más altos,

que el tiempo de les naciones

llegaría sin tardanza

cuando les yegües paríen

los famosos asturcones,

aumentando los cadiyos

de aquella güena yeguada.

Daquién escribió una vez

aquella gran poesía

que, si mal no recuerdo,

d´esta manera dicía:

“Cuasi al frente, de llau de Colunga,

llevanta el Puertu Sueve la cabeza

que i´dio a Roma les potres asturcones

que suben de rodíes una cuesta”.

A veces llegaben llobos

famientos, de otros puertos,

y facíen e´na reciella

unos daños muy siniestros.

Pero los perros, que son

del hombre, los más amigos,

co´la carraca al piscuezu,

dexábenlos aturdíos.

¡Y qué garrotiada se armaba

si llegaben los pastores

con piedres y co´la fonda,

con cibiellos y cachaba!.

“Pel tiempo de toos los Santos

´ta la nieve pe´los campos”:

Asina dicía el refrán;

pero entonces los pastores

empezaban a baxar

pa´los pueblos y los baxos

´onde non podía llegar

la nieve que allá n´os altos

ya empezaba a cuayar.

Y allá arriba e´nes cumbres,

hasta el añu siguiente,

quedaben las cabañines

bien tapaes po´la nieve.

Y, aquella felicidá

que teníen los pastores

non la tienen los turistas

con sus carpes y sus goces

cuando van a veraniar

con un mes de vacaciones.

LA VIDA DE LOS PASTORES

(Para el museo del bable)C. Balbín (mayo 1995)